'n Passie vir God

 
en 'n hart vir mense en 'n wêreld in nood

Die Makwe Missie Projekspan kan bevestig dat die Sendingstasie op Quionga, Mosambiek, wel op Vrydag 19 Februarie 2021 deur insurgente aangeval is as deel van ‘n aanval van die dorp. Daar kan bevestig word dat groot dele van die gebou-infrastruktuur afgebrand is. Ons is tans besig om meer informasie in te win en soos duidelikheid verkry word oor die situasie in Quionga sal verdere aankondigings gemaak word. Die Thiart-egpaar is veilig in Suid-Afrika.

Ons vertrou dat julle die sensitiwiteit van die situasie sal respekteer en alle navrae direk aan die Makwe Missie Projekleier, Nick Olivier, te rig per epos by Hierdie e-posadres word van Spambotte beskerm. Jy moet JavaScript ontsper om dit te lees..

Meeste van ons – hopelik amper almal – weet dat daar dinge in my is wat moet verbeter – wat ek anders moet doen of beter moet doen. As ons vra: “Wat moet in my verander om te wees wat God wil hê ek moet wees – en om te wees wat ek graag sal wil wees?”, dan behoort elkeen van ons ‘n paar dinge te kan opnoem.

Die uitdaging is nie om te weet waar ek moet verander nie – die uitdaging is: Hoekom verander ek nie? Dit is die bul wat ons in Sondag se eredienste by die horings pak. Is jy besig om Jesus te volg of net te glo in Christus? As jy hom volg sal jy ook soos sy dissipels die pad van verandering wil loop.

Dit is die begin van Lydenstyd, ‘n goeie tyd om iets te laat los – ‘n goeie tyd om ‘n nuwe gewoonte aan te leer – ‘n goeie tyd om die mens te begin wees waaroor God en jy droom. Danie Möller praat Sondag verder hieroor.

Die deurkollekte gaan vir Dienssentrum.

Sonder gesellige byeenkomste en koffie kuiers na kerk, is dit uitdagend om gasvryheid uit te leef en mense by mekaar uit te bring en te laat tuis voel. Ons het jou nodig om ons te help dink oor hoe om nou gasvryheid op ander maniere uit te leef in die gemeente.

Ons benodig ook mense vir die verwelkoming by die deure voor die dienste en om nuwe lidmate te laat welkom voel en met hul inskakeling by die Gemeente.

Kom gesels saam - kontak Corneille by Hierdie e-posadres word van Spambotte beskerm. Jy moet JavaScript ontsper om dit te lees. of gee jou naam by in Ontvangs.

 

Aswoensdag, 17 Februarie is die begin van sewe weke Lydenstyd wat ‘n tyd is van selfrefleksie en selfondersoek. Die afgelope jaar het unieke uitdagings aan elkeen van ons gestel. Ons elkeen beleef verskillende emosies en ervaar die uitdagings anders. Tog raak die pandemie en die grendeltyd ons elkeen persoonlik. Miskien is daar vrae in ons gemoed – die hoekoms en waaroms wat ons teenoor God rig.

Aswoensdag is 'n geleentheid om al jou emosies voor God te bring – dit is ‘n tyd van agterlaat, van skuldbelydenis en ja, selfs van rou en treur. Dit is ‘n tyd wat ons na onsself kyk deur die spieël van die kruis.

Kom beleef die begin van die Lydensreis saam met ons deur die aanlyn Aswoensdag video, kliek hier, asook ‘n video van die 12 stasie van die Kruis, kliek hier. Mag hierdie ervaring vir jou (en jou gesin) tot seën wees.

Die jaar 2020 was ‘n groot uitdaging vir ons land en sy mense. Die begin van 2021 was nie veel beter nie. Werksgeleenthede het tot niet gegaan, skole en kleuterskole het toegemaak wat die druk op voedsel voorsiening in die gemeenskappe erg geraak het, kinders wat gewoonlik voedsel ontvang deur die skole voedingsprojek het nou ook by die sopkombuise opdaag vir iets om te eet.

Vir ons Dienssentrum was dit egter ‘n geseënde jaar. Hoe meer ons uitgedeel het, hoe meer het ons Heer voorsien. Besighede, plase, gemeentelede en mense uit die gemeenskap het gesorg dat daar altyd genoeg was vir wie ookal by die Dienssentrum opgedaag het vir hulp.

Ons betrokkenheid strek vanaf Sir Lowry’s Pass tot Eersterivier met verskeie projekte tussen in. Dienssentrum het sy eie projekte en dan voorsien ons ook waar daar nood is aan ons eie gemeentelede, Moedergemeente se lidmate en aan sommige projekte van Uitreik. Tot op hede eet bykans 7 000 mens per week van die voedsel wat uit die Dienssentrum voorsien word.

Vandat die skool gesluit het in Desember voorsien Dienssentrum nie net groente en maalvleis aan projekte nie, maar voorsien ons ook aan vyf van ons projekte pap, melk en suiker vir die kinders.>>

Lees verder: Getuienisgeleentheid: Dienssentrum van Helderberg Uitreik

Top