'n Passie vir God

en 'n hart vir mense en 'n wêreld in nood

Hierdie jaar het anders uitgedraai as wat ons dit verwag het. Ons nuwejaarsvoornemens van 2019 was op die meeste van die plekke nie eers van toepassing nie. Ons het ons vasgeloop! Partymaal beplan ons so mooi verantwoordelik aan ons lewe, baie keer met diep afhanklikheid van die Here (soos ons die Here dan verstaan). Dan gebeur die lewe en word ons vrae oor ons beplanning oor ons verstaan van God oor ons menswees en toekoms baie.

Saulus het so voluit vir God gewerk, was opsoek na God se wil, het met oortuiging dit uitgevoer en hom toe vasgeloop in God. Ek dink nie daar is 'n Bybelskrywer wat ons meer kan leer van stukkende drome en dan te besef dat jy deel uitmaak van God se droom nie. Kom droom Sondag saam met ons.

Paul Barnard sal die diens hou en die deurkollekte gaan vir Radiokansel.

Hierdie Sondag is ons laaste voorafopgeneemde diens vir 2020. Onthou natuurlik dat ons die 09:30 diens elke Sondag lewendig uitsaai (“live stream”) op ons YouTube-kanaal en dis steeds na die tyd beskikbaar op die kanaal. Gaan teken in op Helderberg Gemeente se YouTube-kanaal en jy sal ook elke keer ‘n boodskap kry sodra die diens beskikbaar is.

Met groot dankbaarheid het ons kerkraad Dinsdagaand, 8 Desember 2020, vir Dr Deon Els beroep as predikant vir Helderberg Gemeente. Ons was bevoorreg dat daar ‘n menigte skitterende aansoeke was, maar glo dat God ons gelei het om Deon te beroep. Ons wil graag ‘n beroep doen op die gemeente om te bid vir Deon, Liesel en hulle twee dogtertjies, in hierdie tyd waar hulle ook moet seker maak by God dat dit God se plan is vir hulle lewens.

Deon is tans leraar by Kraggakamma Gemeente in Port-Elizabeth. Hulle het twee dogtertjies wat hulle baie besig hou. Olivia is ’n driejarige woelwater en Emily is 18 dae oud. Liesel besit ’n pediatriese fisioterapie-praktyk wat spesialiseer in vroeë kinderontwikkeling van babas en kinders met neurologiese agterstande. As gesin stap, swem, kamp en braai hulle graag.

13 Desember 2020 om 19:00 in die kerk
Almal, jonk en oud word genooi om die jaar af te sluit met ‘n heerlike fliekaand in die kerk op die nuwe groot skerm. I Still Believe word vertoon en is 'n Christelike romantiese drama wat gebaseer is op die lewe van die Amerikaanse kontemporêre musiek sanger en skrywer, Jeremy Camp en sy vrou.

Bevestig asb. jou plek deur die volgende vorm in te vul (dit neem ongeveer 1 minuut): https://forms.gle/cHVzZfQSs4sgkZ7z7

Mense wat die Aandkerk bywoon, word genooi om die fliek te kom kyk. Daar gaan dan nie ‘n afsonderlike diens wees nie.

Navrae: Annette by Hierdie e-posadres word van Spambotte beskerm. Jy moet JavaScript ontsper om dit te lees.

Absa, tesame met ander groot banke, staak met ingang van 1 Januarie 2021 tjeks as 'n betaalmetode, asook die uitreiking en invordering van tjeks. Ons kan tot 31 Desember 2020 tjeks wissel en deponeer. Geen tjeks sal na hierdie datum by banke aanvaar word nie, ongeag op watter datum dit uitgereik is.

Gebruik asseblief vanaf 15 Desember 2020 een van die volgende opsies om jou bydrae te maak: EFT, SnapScan, kontant of kaartbetalings by kerkkantoor en debietorder (besonderhede is onder aan e-nuusbrief). Baie dankie vir jou bydrae.