Louise Theron tree aan die einde van hierdie maand af as Uitreikbestuurder. Sy was 16 jaar werksaam by Helderberg Gemeente as Helderberg Uitreik se bestuurder met projekte reg oor die wêreld. Haar hart is vir elkeen van hierdie projekte en die mense wat hulle bedien.

Ons het ‘n paar vrae vir Louise gevra en deel dit graag met julle.

Louise jy was die Uitreikbestuurder, maar wat het dit vir jou beteken?
Ek het dikwels gevoel soos iemand wat op ‘n pawiljoen sit en na ‘n meesterlike spel kyk. God se kosbare werk deur sy mense.

Wat het die Here jou geleer in jou tyd by Helderberg Gemeente en Helderberg Uitreik?
Ek het feitlik elke dag ‘n wonderwerk beleef. Kleintjies en grotes. Boodskappe en foto’s van mooi getuienisse van die projekte se impak het ek van oraloor ontvang. Dit is byna onmoontlik om die omvang van God se werk deur die projekte van Helderberg Uitreik in woorde te beskryf. Ek voel ontsettend bevoorreg om ‘n getuie daarvan te wees. Wat het jou gedra in moeilike tye?
Wanneer mens in ‘n span werk wat so naby aan God se hartklop leef, en ook soms op vyandige grondgebied loop, kan mens verwag dat daar ook aanslae en vervolging sal kom. Dit is deel van die terrein waarop ons beweeg. Jesus is ons voorloper en met die Heilige Gees se beskerming, kosbare ondersteuning en gebed van die Uitreikbestuur, projekleiers, uitreikpersoneel, en my gesin, was dit moontlik om ook deur moeilike tye te gaan.>>

My opregte dank aan Helderberg Gemeente en die kantoorpersoneel vir die lieflike werksomgewing die afgelope 16 jaar en 10 maande. Dankie ook aan die Uitreikbestuur en al die uitreikers, vriende, donateurs en vennote oor die wêreld heen – dit was ‘n onvergeetlike reis saam met julle.

Why should anyone hear the gospel twice before everyone has heard it once? – Dr Oswald Smith

Louise, ons gaan jou baie mis, maar weet ook jou pad vorentoe is saam met die Here en dit gaan ‘n avontuur wees.

Melanie Smit is die nuwe Uitreikbestuurder en begin op 1 Maart met haar pligte, kliek hier vir ‘n vorige artikel oor haar. Onthou ook 5 Maart is dit die Uitreikfees waar al die projekte ook teenwoordig sal wees.