'n Passie vir God

en 'n hart vir mense en 'n wêreld in nood

Dis Lydenstyd. Dis Palmsondag. Hierdie intog in Jerusalem merk die begin van Jesus se finale week. Die Markus vertelling beskryf ’n tasbare spanning met ’n onvermydelike konflik. En ons waag dit om onsself oop te maak en saam die stad binne te stap. Die intog met skares wat sing en dans. Kinders wat sing ‘Hosanna in die hoogste’. En dan vind ons hierdie gewelddadige kontras. Jesus is nie welkom nie. Dieselfde mense wat sing en dans skree nou ‘kruisig hom, kruisig hom’. Hierdie Sondag volg ons Jesus oor 3 dae in en buite die stad. Ons volg Jesus in Sy keuse om aan te hou kies vir die onafwendbare kruisdood. Moenie hierdie Sondag 10 April misloop nie. Al ons eredienste is volstoom aan die gang.

Mag jy bewus wees van God se ongetemde liefde vir jou. Mag hierdie lydenstyd vir jou wys hoe Jesus se lewe, keuses en hartklop alles vir jou is.

Groete, Deon Els

Seniorsorg beleef tans opwindende tye. Die veldtog “neem ‘n ouma aan” wat in Oktober geloods is, het Seniorsorg opnuut aan die gemeente bekend gestel. Baie dankie vir elke bydra om seniors wat staatspensionarisse is met basiese behoeftes te help. Daar is maandeliks ‘n groot behoefte aan toiletware, doeke en ander noodsaaklikhede.

Vir die eerste keer in twee jaar kon Seniorsorg weer ouetehuise besoek. Op Woensdag 23 Maart is die seniors by Esperanza besoek vir heerlike samesyn met blomme, sang en musiek en heerlike botterbroodjies wat deur Seniorsorg se span voorberei is. Woensdag 13 April hou Seniorsorg ‘n Paasfees tee by Huis Marie Louw waartydens Danie Möller ‘n Paasboodskap sal bring en Yolande Botha gaan die sang begelei. Hierna word die kuiertjie met ‘n nagmaalviering afgesluit.>>

Lees verder: Getuienisgeleentheid: Seniorsorg

Odette is 'n ou bekende onder lidmate en sal lekker met jou gesels oor haar liefde vir honde.

Die grootste oomblikke in ons lewes is sekerlik die groot liefdes verklarings. Daar waar jou man/vrou vir die eerste keer in jou oë gekyk het en gesê het: Ek is lief vir jou. Wanneer julle aan mekaar bevestig: Jy is my alles. Die eerste keer toe jy jou kind in jou arms vasgehou het en net besef het jy is met jou hele menswees lief vir hierdie mensie. Wanneer jy dan oor en oor sê ek is lief vir jou en dit elke slag voel of jou hart wil bars van hierdie liefde wat amper te groot is vir jou. Hierdie oomblikke maak jou lewe vol en gee jou sin.

Dit gaan nie net daaroor dat wanneer iemand dit vir jou sê nie, maar wanneer jy dit vir iemand anders sê. Ons is geskape na die beeld van God, in God se diepste wese is dit wie Hy is. Die God wat liefhet, die God wat sy liefde teenoor ons uitspreek en leef tot aan die kruis.

Ons kyk Sondag na Lukas 3:1-21 en ons kry God in een van die brose oomblikke waar Hy na sy seun Jesus kyk en sê: Jy is my geliefde seun! Ons het die voorreg om ‘n klomp babas te doop en kom staan weer saam met hierdie babas en hulle ouers voor God. Ons kom staan voor hierdie brose God en hoor dat hy vir my en jou sê: Jy is my geliefde.

- Paul Barnard