In die ouer wingerde van ons omgewing, sien ons in hierdie tyd die prentjie van harde, barre, gesnoeide wingerdstokke; met oral daarop, die mooiste groen botsels. Die ou harde wingerdprentjie klop vir my met die ervaring van emosionele tamheid wat ek oral hoor en sien. Mense is emosioneel krapperig, gespanne en die baklei loop maklik oor.

Die emosionele Covid-19 winter het ‘n houvas op baie van ons gekry. Ons het behoefte aan die groen botsels van hoop en nuwe potensiaal van lewe – ‘n innerlike geestelike lente.

Hoe gebeur dit? Is dit die soort nuwe groei wat eers afhanklik is van ‘n nuwe program van goed wat ek moet doen? Dit is dikwels die resep vir geestelike groei wat kerkmense vir ander wil voorhou. In die verhaal van die kindertjies wat na Jesus toe gebring word (Matteus 19:13-15) ontdek ons hoe anders Jesus hieroor dink. Meer hieroor in Sondag se diens.

Kom gerus na ons spesiale opelug-inrydiens Sondagoggend of kyk saam op YouTube na ons vriendekerk-opname.

Danie Möller

Sondag se deurkollekte gaan vir Sri Lanka.

Ons is opgewonde om vanaf 8 Oktober ‘n internasionale Christelike huweliksverrykingskursus hier by Helderberg Gemeente aan te bied. Hetsy julle nuut getroud is of al 40 jaar getroud is. Hetsy julle verhouding floreer of swaarkry. Hierdie kursus is vir julle.

Die fokus is op sewe verskillende temas insluitende: kommunikasie, hoe om mekaar se behoeftes te verstaan, hoe om konflik op te los, en nog baie meer. Die kursus word so gefasiliteer dat jy en jou geliefde alleen aan tafel sit, die eerste deel van die aand kyk julle saam na ‘n video. Daarna ontvang julle gesprekpunte wat julle self deurwerk in die veilige, romantiese omgewing wat ons gaan skep.

Kostes: R250 per paartjie vir sewe weke (2 joernale ingesluit)
Datums, tyd en plek: Die kursus word op Donderdae vanaf 18:00 tot 20:00 by Helderberg Gemeente in die Tent aangebied op die volgende datums: 8 Oktober, 15 Oktober, 22 Oktober, 29 Oktober, 5 November, 12 November, 19 November.

Neem kennis:
• Weens die huidige Covid-19 regulasies mag ons nie kos voorsien nie.
• Ongelukkig geen kinders.

Skryf in hier: https://forms.gle/x3Y7mWEZuqJMWqJK7 of kontak vir Meagin van der Westhuizen by Hierdie e-posadres word van Spambotte beskerm. Jy moet JavaScript ontsper om dit te lees. of 079 417 3863

Lekker, lekker – Markus is weer terug op sy pos. Sy boodskap: Sag is die brood wat ons eet, wreed is Jesus se liggaam vir ons sonde gebreek, soet die wyn vir ons skink. Bitter die beker wat Jesus moes drink. Die wreedheid, agterbaksheid en liefdeloosheid van mense – Let wel: godsdienstige mense – is ontstellend. Hierdie week se Bybelstudie gaan oor Markus 14:43-72.

Vir die vrae met aantekeninge kliek hier. Die wat graag Donderdag om 09:00 by die gesprek wil inskakel, is welkom.

Zoom skakel: https://us04web.zoom.us/j/74048549210?pwd=MlVVT0MxZ3FIQmhEUGcvODR5ZnROQT09 (Meeting ID: 740 4854 9210 - Passcode: c25FTq)

Die kerkkantoor funksioneer vanaf 1 Oktober 2020 in 'n nuwe normaal. Daar sal nog grasie gegee word vir personeel om gedeeltelik by die huis te kan werk tot 1 Februarie 2021 wanneer die reëling hersien sal word mbt die pandemie.

Kantoorure van 1 Oktober 2020
Maandag – Donderdag van 08:30 – 15:00
Vrydag van 08:30 – 13:00
Sondag ontvangs van 09:00 – 11:30

Ons visie
Missionêr met die intensionele evangelisering en dissipelmaking van onbereikte volkegroepe met die oog op Koninkrykuitbreiding en kerkplanting in Sri Lanka. Ons doen dit saam met ons vennoot, die Christian Reformed Church in Sri Lanka (CRCSL).

Die Christian Reformed Church se embleem is ‘n groot afgekapte of gebreekte boom met ‘n nuwe takkie waar blare groei. Dit is so sinoniem met dit wat tans gebeur. Alles begin by 'n huisgesin waar ander huisgesinne nuuskierig word en die geloofsgemeenskap so groei dat hulle ‘n gemeente word, waaruit nuwe gemeentes ontwikkel.

Die Sri Lanka Projekspan is nog steeds betrokke by drie bedieningspunte, waaruit daar vele ander bedieningspunte ook ontstaan het. As gevolg van veiligheidsredes wil ons eerder nie name en dorpe noem nie omdat hulle dalk onnodig blootstel kan word.>>

Lees verder: Getuienisgeleentheid: Sri Lanka Projekspan

Top